Էլիտար ամերիկյան դպրոցներից մեկի 17-ամյա աշակերտուհի Էնն Հեչերոն ձերբակալված է իր սեփական մորից նոր սպորտային ավտոմեքենա գնելու նպատակով գումար շորթելու համար:

Դեպքը տեղի է ունեցել անցած շաբաթ Ֆլորիդա նահանգի Ֆորտ Մայերս քաղաքում: Հեղինակություն վայելող Canterbury դպրոցում իր գերազանց առաջիդիմությամբ աչքի ընկնող աշակերտուհին, տուն վերադառնալիս, իր մոր ճակատին է ուղղում 9 մմ Sig Sauer ատրճանակը` պահանջելով իր համար նոր Nissan 350Z մակնիշի ավտոմեքենա գնել: Սպառնալով, որ վրեժ կլուծի, աղջիկը մորը ստիպողաբար տանում է ավտոսրահ: Ավտոմեքենայի ձեռք բերման փաստաթղթերի ձևակերպումը կատարվում է աղջկա պայուսակում պահված ատրճանակի առկայության պարագայում, որն այդ ամբողջ ընթացքումն ուղղված է լինում դեպի մորը: Հաջորդ օրը, երբ աղջիկը դպրոց է գնում, մայրը նրա սենյակում բացի ատրճանակից հայտնաբերում է նաև թմրադեղեր, որից հետո դիմում ոստիկանությունը:

Էնն Հեչերոյի մայրը հայտարարել է, որ մեղադրանքներ չի ներկայացնելու իր դստեր դեմ, որպեսզի նրան չզրկեն կրթաթոշակից: Այնուամենայնիվ, դատարանի որոշմամբ ուսանողուհին ձերբակալված է: Ինչ վերաբերվում է ատրճանակին, ապա պարզ է դարձել, որ այն գողացվել է Լի Քանթրիում (Ֆլորիդա) գտնվող նավահանգստի անվտանգության աշխատակցի մոտից դեռևս անցած ամառ: